Այսօր՝ նոյեմբերի 24-ին, Կատարի մայրաքաղաք Դոհայում հանդիսավորությամբ մեկնարկեց Qatar Travel Mart (QTM) 2025 միջազգային ցուցահանդեսը՝ Մերձավոր Արևելքի զբոսաշրջային ոլորտի ամենահեղինակավոր հարթակներից մեկը։ Այս միջոցառումը վերածվում է տարածաշրջանի զբոսաշրջային քաղաքականության և ներդրումային հետաքրքրությունների ուղղորդման գլխավոր կենտրոններից մեկը, որտեղ մասնակցում են աշխարհի տասնյակ երկրներ, հազարավոր զբոսաշրջային գործակալություններ և ոլորտի մասնագետներ։
Qatar Travel Mart–ը համախմբում է․
• միջազգային զբոսաշրջային գործակալությունների ներկայացուցիչներին
• ազգային տուրիզմի մարմիններին
• ներդրողներին
• ավիաընկերություններին
• հյուրանոցային ոլորտի առաջատար մասնագետներին
Ցուցահանդեսը իր հեղինակությամբ և մասնագիտական մակարդակով մեծ ազդեցություն ունի զբոսաշրջային նոր ուղղությունների բացահայտման և գլոբալ համագործակցությունների ձևավորման մեջ։
Այս տարի Հայաստանը հատուկ պատվով է ներկայանում Կատարի շուկայում՝ առաջին անգամ ունենալով իր ազգային տաղավարը։ Մասնակցությունը նոր ու պատասխանատու քայլ է՝ ներկայացնելու Հայաստանի զբոսաշրջային ներուժը այն երկրում, որը վերջին տարիներին դարձել է աշխարհին կապող ավիացիոն և զբոսաշրջային խոշոր հանգույց։
Միջոցառման բացմանը ներկա էր Կատարում Հայաստանի Հանրապետության դեսպան Տիգրան Գևորգյանը, ով ընդգծեց համաշխարհային այս մեծ բեմում Հայաստանի ներկայության նշանակությունը և շնորհակալություն հայտնեց Կատարի զբոսաշրջության գերատեսչությանը՝ Հայաստանի նկատմամբ ցուցաբերված վստահության համար։ ՀՀ Էկոնոմիկայի նախարարության Զբոսաշրջության կոմիտեյի նախագահ Լուսինե Գևորգյանը և մի շարք զբոսաշրջային ընկերություններ։
Հայկական տաղավարը ոչ միայն տեղեկատվական է․ այն նպատակ ունի ստեղծելու մշակութային և գաստրոնոմիկ փորձառություն։ Այցելուները հնարավորություն ունեն բացահայտելու.
• հայկական գաստրոնոմիայի հարուստ աշխարհը, բարձրորակ գինիները և տեղական բերքատեսակը,
• գորգագործության և ձեռագործ մշակույթի ավանդույթները՝ որպես մեր ինքնության առանցքային սյուներ,
• ինչպես նաև Հայաստանի ամբողջական զբոսաշրջային առաջարկը՝ պատմամշակութային ուղիներից մինչև արկածային ճանապարհորդություն ու առողջարանային ուղղություններ։
Հայաստանի առաջին ներկայությունը Qatar Travel Mart–ում բացում է նոր դռներ Մերձավոր Արևելքում զբոսաշրջության զարգացման համար։ Այս քայլը կարող է դառնալ այցելունեի հոսքերի աճի, ներդրումային հետաքրքրության բարձրացման, հայկական գաստրոնոմիայի ու մշակույթի միջազգային ճանաչման կատալիզատոր
Մեր պատվիրակությունը շարունակում է հանդիպել գործընկերների, տուրիստական հարթակների և ներդրողների հետ՝ նպատակ ունենալով ամրապնդել Հայաստանի դիրքը համաշխարհային զբոսաշրջային քարտեզի վրա։