Հայաստանի հյուրանոցային ոլորտը մտնում է կարևոր փոփոխությունների փուլ․ առաջիկայում հյուրանոցները կունենան հնարավորություն ստանալ միջազգային չափանիշներին համապատասխան որակավորում, ինչը կհամապատասխանի եվրոպական ստանդարտներին։
Նախկինում Հայաստանում հյուրանոցների որակավորումը իրականացվում էր հիմնականում տեղական մարմինների կողմից, և գործընթացը հիմնականում կամավոր բնույթ էր կրում։ Արդյունքում, շատ հյուրանոցներ չունեն փաստացի որակավորում, որը հաստատված է միջազգային ստանդարտներով․ նույնիսկ այն հյուրանոցները, որոնք ցուցադրում են աստղային կարգավորում, հաճախ չունեն պաշտոնական հավաստիացում։
Անահիտ Մկրտչյանը, ՀՀ էկոնոմիկայի նախարարության Զբոսաշրջության կոմիտեի Զբոսաշրջության քաղաքականության վարչության պետը հայտարարել է
«Այսօր մենք ունենք ընդամենը մեկ որակավորված հյուրանոց։ Այն հյուրանոցները, որոնց մոտ տեսնում ենք աստղեր, իրականում դրանք չեն ստացվել որակավորող կառույցի կողմից, ինչը ոչ հավասար պայմաններ է ստեղծում ոլորտում»։
Այս փաստը սահմանափակում է ինչպես ներքին մրցակցությունը, այնպես էլ միջազգային ճանաչելիությունը․ զբոսաշրջիկները, հատկապես արտասահմանցի այցելուերը, երբեք լիովին վստահ չեն լինում, որ 4 կամ 5 աստղ ունեցող հյուրանոցը համապատասխանում է միջազգային չափանիշներին։ Հայաստանում գործող բազմաթիվ հյուրանոցներ իրականում համապատասխանում են եվրոպական 3, 4 կամ 5 աստղանի չափանիշներին, սակայն միջազգային որակավորում չունեն։ Այս խնդիրը լուծելու նպատակով կառավարությունը պատրաստվում է հայտարարել մրցույթ, որի շրջանակում կհայտնաբերվի միջազգային միավորում, որը կհամագործակցի հայկական հյուրանոցների հետ՝ միջազգային չափանիշներին համապատասխան որակավորման գործընթացում։
Անահիտ Մկրտչյանի խոսքով, որակավորումը իրականացնող կազմակերպությունը պետք է լինի միջազգային միավորման անդամ և ճանաչված՝ առնվազն 10 երկրներում։ Օրինակ՝ նման կազմակերպություն է Hotelstars Union՝ Եվրոպայում ընդունված չափանիշներով։
Եթե մրցույթն ավարտվի նախատեսված ժամկետներում և ընտրությունը կատարվի, ակնկալվում է, որ արդեն 2026 թվականի առաջին կիսամյակում Հայաստանը կունենա առաջին հյուրանոցները, որոնք կունենան միջազգային որակավորում։ Ներկայում Հայաստանում գործում է ավելի քան 1000 հյուրանոց, և մեկնարկային փուլում մինչև 50 հյուրանոց կստանա միջազգային որակավորում։ Մեկնարկային փուլից հետո որակավորումը կդառնա կամավոր, սակայն ակնկալվում է, որ ստեղծվող մրցակցային միջավայրը կնպաստի ոլորտի ակտիվացմանը, նոր մակարդակի բարձրացմանը և ծառայությունների որակի բարելավմանը։
Նախագիծը քննարկվել է նաև հյուրանոցային տնտեսությունների հետ, և մասնակիցների մեծամասնությունը, հատկապես միջազգային ցանցերում գործող հյուրանոցները, հայտնել են իրենց հետաքրքրվածությունը։ Այս նախաձեռնությունը ոչ միայն կնպաստի Հայաստանի հյուրանոցային ոլորտի մրցունակության բարձրացմանը, այլ նաև կապահովի զբոսաշրջիկների վստահությունն ու միջազգային ճանաչելիությունը։