Հայաստանի զբոսաշրջության ոլորտը շարունակում է ներկայանալ միջազգային հարթակներում՝ բարձր մակարդակով։ Տուրիզմի հայկական ֆեդերացիայի նախագահ Մեխակ Ապրեսյանը ընտրվել է Զբոսաշրջության էթիկայի համաշխարհային կոմիտեի (World Committee on Tourism Ethics) փոխանդամ։ Այս նշանակումը կայացել է ՄԱԿ Զբոսաշրջության (UN Tourism) գլխավոր ասամբլեայի 26-րդ նիստի ընթացքում, որը տեղի է ունենում Սաուդյան Արաբիայի Էր-Ռիյադ քաղաքում։
Զբոսաշրջության էթիկայի համաշխարհային կոմիտեն համարվում է ոլորտի ամենահեղինակավոր կառույցներից մեկը, որը ձևավորում է պատասխանատու և էթիկական զբոսաշրջության գլոբալ սկզբունքները՝ խթանելով արդար, ներառական և կայուն զարգացում աշխարհում։
Մեխակ Ապրեսյանի ընտրությունը որպես կոմիտեի անդամ՝ Հայաստանի համար կարևոր ձեռքբերում է, քանի որ երկրի ներկայացուցիչն առաջին անգամ է ընդգրկվում միջազգային կառույցում, որը պատասխանատու է զբոսաշրջության էթիկական քաղաքականությունների մշակման և վերահսկման համար։
«Էթիկան զբոսաշրջության մեջ ոչ միայն արժեքների, այլև վստահության հիմքն է։ Սա պարտավորեցնող, բայց նաև ոգեշնչող պատասխանատվություն է, որը կրում ենք ոչ միայն մեր երկրի, այլև ամբողջ տարածաշրջանի անունից», — նշել է Մեխակ Ապրեսյանը։
Մեխակ Ապրեսյանը զբոսաշրջության ոլորտում ունի երկարամյա փորձ և հեղինակություն։ Տարիներ շարունակ նա հանդես է եկել որպես ոլորտի զարգացման հետևողական ջատագով՝ ընդգծելով կայունության, կրթության, պետական-մասնավոր գործընկերության և տարածաշրջանային համագործակցության կարևորությունը։
Նրա գործունեությունը կոմիտեում հնարավորություն կտա Հայաստանի ձայնը հնչեցնել այնպիսի հարցերում, ինչպիսիք են՝
• պատասխանատու զբոսաշրջության մշակույթը,
• մարդկային կապիտալի զարգացումը,
• տեղական համայնքների հզորացումը և
• զբոսաշրջության սոցիալական ազդեցության բարձրացումը։
Այս նշանակմամբ Հայաստանը ոչ միայն ներկայացվում է միջազգային ասպարեզում, այլև ներդրում է անում համաշխարհային զբոսաշրջության արժեքային համակարգի ձևավորման գործում։