Zemfira՝ կենդանի լեգենդը գալիս է Հայաստան

Երևանում առաջին անգամ կհնչի այն ձայնը, որը դարձավ մի ամբողջ սերնդի ներքին լեզուն. Zemfira-ն գալիս է Հայաստան։ Առաջին անգամ։ Իրական, կենդանի, անփոխարինելի։ 2025 թվականի հուլիսի 4-ին, Հրազդան մարզադաշտը վերածվելու է բեմի՝ որտեղ հնչելու են ոչ միայն երգեր, այլ՝ զգացողություններ, հիշողություններ, խոստովանություններ։ Դա ուղղակի համերգ չի լինելու։ Դա լինելու է մի հավաքական, լուռ, շատ անձնական համերգ, որտեղ բոլորը կհասկանան՝ ինչու է Zemfira-ն մնում յուրահատուկ, անկրկնելի ու ժամանակից վեր։

Zemfira-ն տարիներ շարունակ եղել է ռուսալեզու տարածքի ամենահզոր, ազդեցիկ ու ինտիմ արտիստներից մեկը։ Նրա ձայնը միաժամանակ փխրուն է ու հաստատուն, խոցելի ու մարտահրավեր նետող։ Հայաստանը երբեք չի եղել նրա համերգային քարտեզում։ Բայց 2025-ի հուլիսին դա փոխվում է։ Եվ դա նշանակալի պահ է ոչ միայն երաժշտասերների, այլ՝ մշակութային ինքնագիտակցության համար։

Ձայն, որն արտահայտում է մի ամբողջ սերունդ

Zemfira-ի երաժշտությունն ամբողջ կարիերայի ընթացքում խուսափել է թրենդերից ու կոմերցիոն ճնշումից։ Նրա ստեղծագործական վեկտորը միշտ ուղղված է եղել դեպի ներս՝ մարդու միայնությունն ու ներքին կոնֆլիկտները բացահայտելու։ Նա երգում է սիրո մասին՝ առանց քաղցր բառերի, կորստի մասին՝ առանց ողբի, ճշմարտության մասին՝ առանց ձևախեղման․

Եվ այդ իսկ պատճառով նա դարձել է շատերի «ձայնը», ով արտահայտում է այն, ինչ իրենք երբեք չեն համարձակվել ձևակերպել։

Տոմսեր․ հասանելի են Tomsarkgh.am-ում և այլ հարթակներում։ Գները՝ 15,000–45,000 դրամ․

Zemfira-ի համերգային ծրագրում ընդգրկված են լինելու ինչպես նրա նոր ալբոմի ստեղծագործությունները («Земфира от Луки»), այնպես էլ՝ այն երգերը, որոնցով նա ապրել է մեզ հետ, մեր կողքին՝ “Искала”, “Хочешь?”, “Ариведерчи”, “Бесконечно”, “Ромашки” և այլն։