Միջազգային զբոսաշրջային հեղինակավոր Wanderlust պարբերականը պաշտոնապես ընդգրկել է Հայաստանը Wanderlust Good to Go List 2026 ցանկում՝ մեր երկիրը ներկայացնելով որպես տարվա ամենաոգեշնչող և հեռանկարային զբոսաշրջային ուղղություններից մեկը։ Այս ճանաչումը Հայաստանի համար կարևոր հանգրվան է միջազգային զբոսաշրջային քարտեզի վրա և հերթական ապացույցը, որ երկիրը կարողանում է հետաքրքրել պահանջկոտ և գիտակից ճանապարհորդին։
Վերջին տարիներին տարածաշրջանում տեղի ունեցած փոփոխությունները միջազգային զբոսաշրջային մամուլում ներկայացվում են որպես նոր հնարավորությունների բացում Հարավային Կովկասի համար։ Wanderlust պարբերականը նշում է, որ տասնամյակներ շարունակված հակամարտության ավարտը նպաստել է տարածաշրջանի նկատմամբ հետաքրքրության աճին, ինչի արդյունքում այս տարի զգալիորեն ընդլայնվել են ինչպես Հայաստանի, այնպես էլ Ադրբեջանի զբոսաշրջային հնարավորությունները։
Wanderlust Good to Go List-ը ձևավորվում է ամեն տարի՝ նպատակ ունենալով առանձնացնել այն երկրներն ու ուղղությունները, որոնք ոչ միայն գրավիչ են իրենց տեսարժան վայրերով, այլև առաջարկում են իրական, ինքնատիպ փորձառություններ, խթանում են պատասխանատու զբոսաշրջությունը և պահպանում են իրենց մշակութային ինքնությունը։ Ցանկը ստեղծվում է Wanderlust-ի փորձագետների, ճանապարհորդների և ոլորտի մասնագետների բազմամյա փորձի ու վերլուծության հիման վրա և միջազգային զբոսաշրջային միջավայրում համարվում է վստահելի ուղեցույց։
Հայաստանի ընդգրկումը 2026 թվականի ցանկում պաշտոնապես ամրագրվեց FITUR 2026 միջազգային զբոսաշրջային ցուցահանդեսի շրջանակում, որտեղ Wanderlust պարբերականը Հայաստանի Հանրապետության Էկոնոմիկայի նախարարության Զբոսաշրջության կոմիտեին հանձնեց համապատասխան վկայականը։
Այս ճանաչմամբ Հայաստանը ներկայացվում է որպես երկիր, որտեղ ճանապարհորդությունը վերածվում է պատմության, մշակույթի և կենդանի ավանդույթների բացահայտման։ Մեր երկրի բազմաշերտ ժառանգությունը, գաստրոնոմիան, բնությունը, փոքր համայնքներում պահպանված ավանդույթներն ու մարդկանց ջերմ հյուրընկալությունը այն արժեքներն են, որոնք այսօր միջազգային ուշադրության կենտրոնում են հայտնվում։
Wanderlust Good to Go List 2026-ում ընդգրկվելը ոչ միայն պատիվ է, այլև պատասխանատվություն։ Այն ընդգծում է, որ Հայաստանը հետաքրքիր է աշխարհի տարբեր երկրներից ժամանող ճանապարհորդների համար և միաժամանակ կարևորում է կայուն ու գիտակցված զբոսաշրջության զարգացումը։ Սա հրավեր է բացահայտելու Հայաստանը ոչ թե որպես սովորական ուղղություն, այլ որպես փորձառությունների երկիր, որտեղ անցյալը, ներկան և ապագան ապրում են միևնույն ճանապարհորդության մեջ։