Հայաստանի օդային դարպասը՝ Երևանի «Զվարթնոց» միջազգային օդանավակայանը, շուտով նոր էջ կբացի ոչ միայն ավիացիայի, այլև տուրիզմի և հյուրընկալության ոլորտի համար։
«Արմենիա միջազգային օդանավակայաններ» ընկերությունը նախատեսում է առաջիկա տասնամյակում ներդնել 500 միլիոն դոլար՝ նոր տերմինալի կառուցման նպատակով։
Այս ներդրումը հսկայական նշանակություն ունի երկրի տնտեսական, տուրիստական և հյուրընկալության ոլորտի զարգացման համար։ Օդանավակայանը հանդիսանում է Հայաստանի այցեքարտը՝ առաջին տպավորությունը, որ ստանում է յուրաքանչյուր զբոսաշրջիկ։
Երևանը վերջին տարիներին զգում է տուրիզմի կայուն աճ․ 2023-ին և 2024-ին Հայաստան ժամանած զբոսաշրջիկների թիվը շարունակել է աճել, իսկ օդանավակայանի ուղևորահոսքը հասել է ավելի քան 5.5 միլիոնի։ Գործող ենթակառուցվածքները այլևս չեն բավարարում այս հոսքին, ինչի հետևանքով առաջացել է ընդլայնման բնական պահանջ։
«Երբ մենք 2001-ին ժամանեցինք Հայաստան, օդանավակայանի ենթակառուցվածքը գրեթե փլուզման եզրին էր։ Մենք այն վերակառուցեցինք՝ ստեղծելով ժամանակակից տերմինալ, որը հիանալի ծառայեց երկրին ավելի քան տասնամյակ։ Այժմ ցանկանում ենք կրկնապատկել օդանավակայանի թողունակությունը՝ ներդնելով 500 միլիոն դոլար», — ասել է Մարսելո Վենդեն, ընկերության գլխավոր գործադիր տնօրենը։
Նոր տերմինալը նախատեսվում է կառուցել տարածաշրջանի ամենաժամանակակից չափանիշներով, ներառելով ավտոմատացված գործընթացներ, թվային և կենսաչափական համակարգեր, ընդլայնված սպասասրահներ ու կայանատեղիներ։
Տարեկան միլիոնավոր նոր ուղևորների ավելացումը անմիջական ազդեցություն կունենա Հայաստանի հյուրանոցային, ռեստորանային և ծառայությունների ոլորտների վրա։
Ավելի շատ ուղևորներ՝ նշանակում են․
• նոր հյուրանոցների և հյուրատների բացման պահանջ,
• բարձրակարգ սպասարկման պահանջարկ,
• նոր ներդրումներ՝ ռեստորանային բիզնեսում,
• զբոսաշրջային ծառայությունների և տեղական արտադրանքի սպառման աճ։
«Զվարթնոցը» դառնում է ոչ միայն ավիացիոն կենտրոն, այլև տուրիզմի և հյուրընկալության էկոհամակարգի կարևոր հանգույց, որտեղ սկսվում է յուրաքանչյուր այցելուի առաջին շփումը Հայաստանի մշակույթի և հյուրընկալության հետ։
Նոր տերմինալի շնորհիվ Հայաստանը կարող է վերածվել տարածաշրջանային տրանսպորտային և զբոսաշրջային կենտրոնի՝ մրցունակ դառնալով Թբիլիսիի, Բաքվի և Դուբայի ուղղությունների հետ։
Բարելավված ենթակառուցվածքները կխթանեն ոչ միայն զբոսաշրջությունը, այլև գործարար ճանապարհորդությունները, MICE տուրիզմը, ինչն անմիջապես կապված է HoReCa ոլորտի ակտիվության հետ։
Զվարթնոցի նոր տերմինալը խորհրդանշում է երկրի պատրաստակամությունը՝ ընդունելու ավելի շատ հյուրեր, բարձրացնելու սպասարկման մակարդակը և ստեղծելու ժամանակակից տուրիստական միջավայր։