Դիլիջանում գործող Ապիցիուս Արմենիա Հյուրընկալության Միջազգային Դպրոցը նախօրեին հյուրընկալեց ուսանողների ընտանիքի անդամներին՝ կազմակերպելով ջերմ և հիշարժան հանդիպում։ Այս հանդիպումը հնարավորություն էր ծնողների համար ավելի խորությամբ ծանոթանալու այն միջավայրին, որտեղ կրթություն են ստանում իրենց երեխաները։
Ծնողները շրջեցին ուսումնական տարածքներում, այցելեցին լսարաններ, խոհանոց, կրթական ու ստեղծագործական անկյուններ։ Նրանք իրենց աչքով տեսան, թե որտեղ և ինչպես է անցնում ուսանողների ամենօրյա կյանքը, ինչ պայմաններում են նրանք սովորում և զարգանում։ Այս ամենը ծնողներին հնարավորություն տվեց ոչ միայն պատկերացում կազմել կրթական միջավայրի մասին, այլև զգալ այն մթնոլորտը, որում իրենց երեխաները ստանում են գիտելիք և կառուցում ապագան։
Այցի ընթացքում ծնողներին ներկայացվեցին նաև դպրոցի ընթացիկ ծրագրերը և դեռ կառուցման փուլում գտնվող նոր նախագծերը, այդ թվում՝ GreenRock-ի տարածքը, որը խոստանում է դառնալ ուսումնական գործընթացի նոր արժեքավոր բաղադրիչ։
Այսպիսի նախաձեռնությունները ամրապնդում են փոխադարձ վստահությունը և ստեղծում համագործակցային համայնք։ Երբ ծնողները մոտիկից տեսնում են կրթական պայմանները, զգում են այն ջերմ մթնոլորտը, որտեղ երեխաները սովորում են, նրանց վստահությունն ու ներգրավվածությունն ավելի խորանում է։ Ապիցիուս Արմենիան ևս մեկ անգամ ցույց տվեց, որ կրթությունը միայն գիտելիք տալու գործընթաց չէ․ այն համատեղ ճանապարհ է, որտեղ ուսուցիչները, ուսանողները և ծնողները միասին են կառուցում ապագան։ Իսկ նման հանդիպումները դառնում են այդ ճանապարհի անբաժան մասնիկը՝ ստեղծելով վստահելի և հոգատար համայնք։