Օրեր առաջ Իջևանի գինու, կոնյակի գործարանը Հայաստանի ազգային պատկերասրահում ներկայացրեց իր տեսակով եզակի «Նարեկացի» գինին՝ նվիրված հայ միջնադարյան հոգևորական, աստվածաբան, բանաստեղծ, երաժիշտ և փիլիսոփա Գրիգոր Նարեկացուն:
«Նարեկացի» կարմիր, չոր գինին աշխարհին պատմելու է Գրիգոր Նարեկացու, հայկական մշակույթի ու գինեգործության մասին։ Այն Իջեւանի գինու-կոնյակի գործարանի մի քանի տարվա երազանքն է, ստեղծվել է համբերության ու քրտնաջան աշխատանքի արդյունքում։ Յուրահատուկ «Նարեկացի» կարմիր գինին պատրաստվում է Արենի խաղողի տեղածին տեսակից, որն աճեցվում է Վայոց ձորի մարզի Աղավնաձոր գյուղում՝ ծովի մակարդակից 1500-1800 մետր բարձրության վրա։ Գինին ֆիլտրված չէ եւ շշալցվելուց հետո անցնում է առնվազն վեցամսյա հանգստի փուլ։
Գինին յուրահատուկ տուփ ունի, որի ներսում պատկերված է Գրիգոր Նարեկացու մասին հյուսված առասպելներից մեկը, փաթեթավորման վրա ներկայացված է նաև Գրիգոր Նարեկացու կենսագրությունն ու Հռոմի Ֆրանցիսկոս պապի կողմից նրան տիեզերական վարդապետի կոչում շնորհելու մասին տեղեկությունը, ինչն էլ ավելի է նպաստում հայկական մշակույթի եւ հոգեւոր արժեքների միջազգային ճանաչմանը․
ProdExpo դեգուստացիոն միջազգային մրցույթի 26 տարիների պատմության ընթացքում Իջևանի գինու-կոնյակի գործարանի նորույթ «NAREKATSI» կարմիր, չոր գինին առաջին անգամ Հայաստան է բերել «Գրան պրի» ամենաբարձր մրցանակը, որը նոր նշաձող է հայկական գինեգործության համար։
